މަތީ ތައުލީމުގެ ފައިނޭންސިންގ އާއިބެހޭ ސިޔާސަތުގެ ދިރާސާއަށް ޔުނިވަރސިޓީ ދަރިވަރުންގެ ޚިޔާލު ހޯދައިފި...
މަތީ ތައުލީމުގެ ފައިނޭންސިންގއާއިބެހޭ ސިޔާސަތެއް އެކުލަވާލުމަށްޓަކައި މިހާރު ކުރަމުންދާ ދިރާސާއަށް ޔުނިވަރސިޓީ ދަރިވަރުންގެ ޚިޔާލު ހޯދައިފިއެވެ. ރޭގެ 2030ގައި ދަރިވަރުންގެ ޚިޔާލު ހޯދުމަށް އަމީނީ ބިލްޑިންގގައި ބޭއްވި ބައްދަލުވުމުގައި ޔުނިވަރސިޓީގެ 05ފެކަލްޓީއެއްގެ ދަރިވަރުން ބައިވެރިވެފައިވެއެވެ.
ގަޑިއެއްހާއިރަށް ދިގުދެމިގެންދިޔަ މި ބައްދަލުވުމުގައި ދަރިވަރުންވަނީ މިހާރުގެ ލޯން ސްކީމްގެ ހުރި މައްސަލަތަކާއި އަދި އެހެންމެ މިހާރަށްވުރެ ރަނގަޅަށް ލޯންސްކީމް ބިނާކުރުމަށް ކުރެވިދާނެ ކަންތައްތަކުގެ މައްޗަށް އަލި އަޅުވާ ޚިޔާލު ފާޅު ކޮށްފައެވެ. މި ގޮތުން ދަރިވަރުންވަނީ މިހާރުގެ ލޯން ސްކީމުން ލޯން ނަގައިގެން ޑިގްރީއެއް ހަދައިފިނަމަ، ދެން މާސްޓަރސް ކިޔެވުމަށް ދެވޭނީ 10އަހަރު ފަހުންކަމަށް ވިދާޅުވެފައެވެ. މިގޮތަށް ދިމާވާން މެދުވެރިވާ ސަބަބަކީ ފުރަތަމަ ނެގި ލޯން ދައްކަމުން އިތުރަށް ކިޔެވޭނެ ފައިސާގެ ތަނަވަސްކަމެއް ނެތީމާކަން ދަރިވަރުން ފާހަގަކުރިއެވެ. މީގެ އިތުރުން މިހާރުގެ ލޯނުގެ އިންޓަރެސްޓްނަގާކަންވެސް ދަރިވަރުންވަނީ ފާހަގަ ކޮށްފައެވެ.
މި ދިރާސާކުރާ 05 ކޮންސަލްޓަންޓުންއާއި އެކުބޭއްވި މިބައްދަލުވުމުގައި މާލޭގައި ދިރިއުޅުމުގެ އަގުތަކާއި، ޚަރަދުތަކާއި އަދި ދަތިތަކާ ބެހޭގޮތުން ފުޅާ ދާއިރާއެއްގައި ވާހަކަދެކެވިފައިވެއެވެ. މިގޮތުން މަހެއްގެމައްޗަށް ދަރިވަރުން ދައްކަމުންދާ ކުއްޔާއި، މާލޭގައި ދިރިއުޅުމަށް ތަންތަން ހޯދާ ގޮތާއި، މީހާރު މިކަންކަމަށް ކުރާޚަރަދު ހޯދާގޮތުގެ މައްޗަށް އަލިއަޅުވާ ވާހަކަ ދެކެވިފައިވެއެވެ.
މަތީ ތައުލީމު ޚާސިލް ކުރަމުންދާ ހުރިހާ ދަރިވަރުންގެ މެދުގައި ހަމަހަމަ އުސޫލަކުން ފައިސާގެ އެހީ ދެއްވުމަށްއެދި ޤައުމީ ޔުނިވަރސިޓީގެ ދަރިވަރުންވަނީ ތަފާތު މީޑިއާ ތަކުގަޔާއި އަދި ރައީސް އޮފީސްދޮށުގައި ގޮވާލާފައެވެ.
